|
Os territórios estremeiros na TVG |
|
|
|
Luns, 10 de Setembro do 2007 |
O DOCUMENTÁRIO FRONTEIRAS PAGA A PENA OLHA-LO
Realiza um percurso polas regiões estremeiras galegófonas das Astúrias e Castela e Leom batendo o ponto sobre qual a comunidade cultural à que devem pertencer
PGL.- Já está na rede o documentário Fronteiras, realizado por Rubén Pardiñas e que se emitiu na TVG o passado 25 de Julho, Dia da Pátria.
Na fita recolhem-se declarações de vizinhos das diferentes terras visitadas, mas também de personagens de projecçom pública como Héctor Silverio (académico da RAG no Berzo), Marisa Cela (Associaçom de Gaitas de Vila Franca), Xosé Manuel Beiras, Manuel Fraga, Xosé Luís Méndez Ferrín, Anxo Angueira, Maurício Castro, Xavier Frías, Ramón d'Andrés, Xosé Manuel Barreiro ou Ana Cano (presidenta da Academia de la Llingua Asturiana, ALLA).
O documentário reflecte tanto a convivência cultural quanto as polémicas que surgem da situaçom de transiçom, o 'efeito fronteira'. Desta forma, no Berzo (província espanhola de Leom) ou nas Portelas (província espanhola de Zamora) comprova-se como a galeguidade cultural está implícita ou explicitamente assumida.
Estes factos contrastam com a negaçom da língua que se produz nas Astúrias, onde a ALLA nega o estátus de língua para o galego da regiom e subordina-o a mais umha variante do asturiano. Preicsamente, em Fronteiras também se relata a mudança de opiniom da ALLA nos últimos anos, para passar de reconhecer o galego como umha língua das Astúrias a classificar como dialecto do asturiano as falas eu-naviegas (também tratado num informe da associaçom Abertal). Na fita tampouco falta umha visita às terras minhotas de ambas as margens do rio para bater o ponto sobre a tam debatida unidade lingüística. Apesar das opiniões, que podem ser divergentes, em Fronteiras comprova-se a plena unidade do idioma Aquém e Além-Minho numha situaçom muito similar à do Eu-Návia. O autor Rubén Pardiñas (Vigo, 1976) é Licenciado em História da Arte pola Universidade de Santiago de Compostela. Começou no mundo audiovisual como director artístico e paralelamente foi desenvolvendo umha trajectória dedicada à crítica da arte contemporânea, campo no que tanhou o XII Premi Espais a la Crítica d´Art (em catalám, Prémio Espaços à Crítica da Arte) e o II Premio CajaMadrid de Ensayo (em espanhol, Prémio CajaMAdrid de Ensaio). O projecto de Fronteiras recebeu em 2006 o Prémio Xpréssate em Tui ao melhor projecto de documentário no Play-Doc e estreou-se este ano no mesmo festival. + Mais informaçom: - Confira Fronteiras na rede - Sítio web do Play-Doc
|
