Praticamente non hai lugar do noroeste da Península Ibérica que non reivindique ser o auténtico Medulio: desde Astúrias e Cantabria até Tui e A Guarda, pasando pola Baixa Limia, O Courel e diversos pontos próximos ao Miño, seguindo os textos de Paulo Orosio. Pero unha das áreas onde se situou máis veces é o Berzo. As semellanzas dos topónimos xogan ao favor destas teorías.
Unha das últimas accións para reivindicar a situación do Medulio levou-na a cabo o Partido Rexionalista do Bierzo. Un grupo de voluntarios, encabezados polo presidente da formación, Tarsicio Carballo, fixeron limpeza das silveiras dun tramo da antiga calzada romana que atravesa a zona, na Serra da Enciña da Lastra, próxima ás Médulas. "Estamos seguros de que é o Monte Medulio", afirmou.
Segundo Carballo, todos os dados coinciden: "a guerra contra os cántabros fora en Bergida, que é o Castro Bergidum, a carón de Cacabelos". Ao seu entender, cando os habitantes dese recinto amurallado fuxiron aos montes viciños "e non ían fuxir a Tui, a 300 quilómetros, ou a Cantabria", polo que avoga pola Serra da Lastra.
"Ten moita vexetación, é chá, inacesíbel desde a parte do Berzo, e ten 23 quilómetros de perímetro, como os da fosa". Aínda ben que os romanos facían alusión a un monte a carón do Miño, esta serra dá ao Sil, que, segundo Carballo "para eles era o Miño".
Outros pontos a favor son os restos de fosos que hai no monte e un romance do século XII "recollido hai século e medio" sobre feitos acontecidos no Medulio que recolle topónimos que aínda perduran na zona, como o monte Biobra (Biobra é unha parroquia do concello de Rubiá, tamén na Serra da Lastra).
Sobre as outras teorías que existen sobre o verdadeiro emprazamento, Tarsicio Carballo, asegura que "moitos estudos apontan xa a que este é o Monte Medulio, ao lado do Miño, que se confundía co Sil. É unha zona onde se ve o foso. Alí caberían 40 mil persoas perfeitamente. E tamén está o Pico Tara, que era o monte sagrado".
Tamén xustifica a súa teoría pola cantidade de covas que existen na serra, e nas que se atoparon restos de asentamentos moi antigos. Carballo anunciou que lles pedirá á Junta e ao Consello do Berzo que lles axuden a limpar o camiño cara á Cidade.
