Dende a CiberIrmandade seguimos a traballar por facilitar o acceso á información de ámbito galego que hai pola Rede e comezamos por ofrecerche varios motores de procura instalables no navegador Firefox (pódese descargar de balde aquí se así o desexas), que che permitirán acceder de xeito máis doado ao noso Web, Buscador de Empresas, Foros ou Galería de Imaxes. Asemade tamén poñemos á túa disposición un motor de procura para acceder á Galipedia.

A instalación é moi doada, tan só tes que acceder a esta páxina (preme na ligazón), e logo premer enriba do nome do motor que queiras instalar.

Seguiremos traballando e esforzándonos por ampliar a lista de dispoñibilidades polo que che convidamos a que pases de cando en vez polo noso sitio na Rede ou esteas pendente das nosas canles de información habituais. Lembrarche tamén que hai traballo abondo e a túa colaboración será sempre moi ben recibida.

Pola celebración do Día das Letras Galegas deste ano, a Radio Piratona, a radio libre de Vigo (106.0 FM), dentro da súa programación especial co gallo da mesma, emitiu unha entrevista á CiberIrmandade da Fala onde se fai un certo repaso en conxunto das actividades e posibilidades que ofrecemos e compartimos.

Poñemos o arquivo de audio, xentilmente ofrecido por Radio Piratona, á túa disposición na nosa zona de descargas. Rematar cos nosos parabéns á Radio Piratona pola súa laboura así coma co noso agradecemento polo seu interese verbo do noso traballo.

Descargar audio

A CiberIrmandade pon a disposición dos internautas galegos e galegas, dous recentes documentos da Fronte Popular Galega (FPG), o Manifesto do Día das Letras e a nota de prensa da súa V Asembleia Nacional (21/05/2006).

Ademais dun profundo debate sobre o sistema organizativo e dunha ampla reflexión sobre o papel da FPG na Galiza de hoxe, os documentos afondan na análise da situación mundial, europea, e do Estado español. Dedicación especial mereceu a valoración, interpretación e procura de alternativas para a situación galega, co goberno do PSOE-BNG, e cun proceso de reforma estatutaria en marcha, aos que cualifican (goberno e reforma), como sumamente insatisfactorios ante as necesidades e urxencias do pobo e da nación galega.

Nestes tempos de manis da LOU, do Iraque, antiglobalización, anti-peaxe, ENCE e moitas mais, nun ano que será lembrado pola greve do metal en Vigo e pola Lingua en Compostela, faise necesario incrementar a organización e argallar novos xeitos de loita. Nesta situación, eiquí tedes as reflexións da FPG.

- Descargar información da V Asembleia Nacional da FPG. 21/05/2006
- Descargar Manifesto Día das Letras. Direción Nacional da FPG. 17/05/2006

A CiberIrmandade da Fala, en solidariedade co centro social A Esmorga, ven de poñer en marcha un novo servizo de apoio ás campañas de denuncia e información que teñan en marcha outros colectivos da nosa terra. Dende hoxe mesmo, na parte dereita do noso web publicaremos as bandeiras que se nos acheguen sobre loitas cidadás que estean en marcha e que se irán visualizando mediante rotación en cada acceso ao noso web. Deste xeito queremos solidarizarnos e facer saber á xente que no noso pais hai moitas campañas abertas que necesitan ser espalladas.

Se participas nun colectivo, paxina web, asociación ou centro social que estea actualmente nalgunha loita, fainos chegar a túa proposta ao foro de "Obxectivos e campañas". As bandeiras (ancho máximo 140), podes deixalas no foro de "Subir arquivos". A colaboración da CiberIrmandade nas distintas campañas está sometida á aceptación dos CiberIrmandiñ@s mediante votación popular.

Aínda que pareza que en Galiza existen 1000 campañas, nos consideramos que todas elas son a mesma. A campaña pola dignidade, respecto e liberdade da nosa cultura e das nosas ideas.

Agardamos as túas bandeiras.

Enviar prego

Nun día especial como hoxe dende a CiberIrmandade queremos apoiar tódalas propostas que procuren a dignificación, revitalización e posta en valor da nosa Lingua e Cultura, e concretamos máis específicamente a nosa adhesión aos manifestos d'A Mesa pola Normalización Lingüística (Porque temos, porque queremos, porque debemos) e ao do Colectivo Nacionalista de Marín que reproducimos nestas páxinas.

Nembargantes queremos tamén lembrar que a importancia e imprescindibilidade da nosa Lingua é cousa de tódolos días do ano e non un evento que celebrar de feito illado, polo que o esforzo de todos e todas non pode quedar só nesta festa, senón extenderse ao resto do ano na procura dunha normalización real do galego.

Eis os documentos apresentados á (sub)comissom da Língua do Bloco Nacionalista Galego, por Alexandre Banhos, para o seu debate na Convençom nacional que sobre a língua acordara a XI assembleia nacional do BNG.

A convençom celebrou-se em Santiago de Compostela o sábado 22 de Abril de 2006, e do documento da analise jurídica, só se discutiu a parte do mesmo que nom tratava sobre o artigo 3 da proposta estatutária,  é dizer, o artigo cerne da proposta.  O outro documento finalmente nom foi objecto de debate a convençom.

Polo interesse que achamos nos dous textos, Ciberirmandade da Fala disponibiliza-os para todos os internautas.

- Analise juridico da proposta estatutaria do BNG no campo da lingua
- A lingua galega. De onde vimos e a onde vamos

Outros documentos relacionados:
- Texto articulado de Estatuto de Autonomía polo BNG

Apos duas semanas de campanha polo uso da nosa lingua no deporte, acadamos entre todos e todas mais dun centenar de pregos enviados e unha primeira resposta positiva dende a Xunta da Galiza. Inda asi, fica caminho por caminar. Pra acadares este obxetivo e imprescindíbel continuar, e por iso a CiberIrmandade pide a toda persoa preocupada polo futuro da nosa lingua que lhe adique un minuto a enche-lo formulario.

O envio de pregos é o alicerce da CiberIrmandade e polo tanto sen a tua axuda nada do noso trabalho teria repercusión. No que vai de ano acadamos diversos obxetivos grazas a colaboracion da sociedade internauta galega. Hoxendía, co enorme crecemento da blogoesfera galega, estanos a ser mais doado atopar sitios web que espalhan ao ar as nosas campanhas mais iste incremento non se acaba de notar no numero de pregos enviados. Ben sabemos que moita xente apoia todas as nosas iniciativas mais é moi importante asinar e manda-los pregos.

Unha pequena reflexión: canto tempo pasamos diante do ordenador recibindo información, e canto tempo pasamos enviando ou actuando directamente dentro da Rede? Convidamosche a actuar mais, adicandolhe algún tempo a trabalhar en campanhas virtuais. Na CiberIrmandade temos unha chea de trabalho e tarefas pendentes, mais das que podemos desenrolar; por iso aproveitamos dende eiquí a invitar a toda-las persoas que queiran trabalhar en equipos virtuais e defender a nosa lingua ante o ataque diario na que se atopa.

Co gallo do 17 de maio, queremos reinterpretar a "nova tradición" de que nas celebracións do día do libro, con cada un se regale unha rosa. Que mais galego que o toxo, planta nacional de Galiza.

Na CiberIrmandade da Fala queremos dar o primeiro paso, polo que convidamos aos webs galegos a colocar no seu sitio a flor do toxo dende o 8 ao 21 de maio, co obxectivo de que para o día do libro do ano 2007, esta proposta sexa unha realidade nas librarías da Galiza.

Neste enlace atoparás mais información da campaña, incluindo o script para poñer no teu sitio a flor do toxo, envio de postais.. Participa. Ver campaña un libro-un toxo.

A CiberIrmandade suspende os envios de correos á Escola Tecnica Superior de Arquitectura da Coruña, obxectivo posto en marcha o 18 de marzo.

O día 28 de abril, recibimos correo da Escola indicando a intención do actual equipo directivo de, entre outras cousas, promocionar o galego e usalo de xeito cotián. Nembargantes parece que teñen problemas legais co web, de xeito que nistes intres está fora do seu control e non poden levar adiante o proceso.

Cónstanos a boa vontade por parte da dirección da Escola, polo que suspendemos a campaña durante un mes para darlles tempo a traballar nese proceso de normalidade lingüística.

Mentres, a seguir coas Federacións deportivas galegas.

Na Galiza, o deporte fala maioritariamente en lingua allea. Revisados os webs de 31 federacións deportivas, concluímos que a situación da nosa lingua é de inferioridade respecto do castelán. 

Inda que temos que destacar que hoxe en día existen federacións que empregan o galego a todos os niveis, e que deberían ser exemplo a seguir, 17 delas so ofrecen os seus contidos en castelán, fronte a 8 que o fan en galego e 6 bilingües (algunhas destas con grandes deficiencias na versión galega).

No referente á toponímia, 16 respeitan a oficial, mentres que 15 a deturpan, menoscabando así a nosa lingua e cultura.

A maioría das federacións teñen logotipo da Xunta de Galiza ou da Fundación Deporte Galego, polo que entendemos que reciben axudas ou subvencións públicas. É inaceptábel que entidades que reciben fondos públicos non fagan uso da lingua propia da Galiza.

A CiberIrmandade da Fala fai un chamamento a toda persoa orguiosa da nosa lingua a que esixa o seu uso, mediante o achegamento dun correo electrónico dirixido á Conselleira de Cultura e Deporte, ao Director Xeral para o Deporte, e a todas as federacións deportivas galegas. Podes facelo aquí e agora cumprimentando o teu nome.

Ver informe  -  Enviar correo.