A CiberIrmandade da Fala e Arquitectura Galega anuncian o acordo de asociación polo que o foro de Arquitectura Galega pasa a ser un mais dos foros da CiberIrmandade.

Arquitectura Galega comprometese a fornecer e dinamizar contidos sobre cuestións que teñan que ver coa arquitectura feita por e para Galiza. A CiberIrmandade xestionará o mantemento e actualización do software do foro.

Con este acordo, ámbalos dous sitios queren sumar e incrementar a participación recíproca dos foros.

Moi mal están as cousas cultural e lingüisticamente dende un punto de vista galego no ramo da arquitectura... Se ben o web do Colexio de Arquitectos está en galego (e por defecto) vai camiño de, na próxima remodelación que fagan, deixalo só castelán. As publicacións fanse xa na súa gran maioría só en castelán (con portadas en galego pra "da-lo pego").

E, claro, o web da Escola Técnica Superior de Arquitectura da Cruña está só en castelán (é un dos nosos obxectivos máis veteráns –marzo 2001-), e a pesares da solicitude, por parte do Servizo de Normalización Lingüística da Universidade, de tradución do seu web, seguen incumprindo coas peticións, desexos dos visitantes e coa legalidade que marcan os Estatutos universitarios.

Esto din os Estatutos da USC no seu artigo 5º:

1.- Na Universidade da Coruña serán linguas oficiais as recoñecidas no Estatuto de Autonomía de Galicia, sen que se poida facer discriminación por razóns de uso de calquera delas.

2.- A lingua propia da Universidade da Coruña é o galego, que será o seu vehículo normal de expresión. Para a súa normalización fomentará o seu uso en todas as súas actividades.

Convidámoste a esixir os teus dereitos lingüísticos, dende aquí e agora con so cumprimentar o teu nome e correo, e na medida do posíbel, a que espalles esta información.

O correo que che ofrecemos (con dous modelos que poderás seleccionar), vai destinado ao Laboratorio de Deseño Asisitido, con copia para o reitor, director e subdirector da Escola, así como ao xefe do gabinete do reitor.

A CiberIrmandade da Fala e a asociación cultural Fillos de Galicia anuncian o acordo polo que a CiberIrmandade pasa a hospedarse no servidor de RedeGalega.org, propiedade de Fillos de Galicia.

CiberIrmandade e Fillos consideramos que a unión de todos os galegos e galegas, residentes e emigrantes, naturais de Galiza e descendentes, debe basearse na nosa lingua común, e para que as persoas que queren recuperar o idioma dos seus antergos teñan información dispoñíbel na nosa lingua, a Fillos parécelle fundamental apoiar unha iniciativa como a da CiberIrmandade da Fala. Por isto, pola converxencia dos nosos obxectivos culturais e lingüísticos, Fillos de Galicia decide fornecer aloxamento de balde á CiberIrmandade que permita sumar esforzos e optimizar recursos.

CiberIrmandade e Fillos esperamos que a colaboración se estenda a outros ámbitos e que os milleiros de participantes na comunidade virtual Fillos.org poidan apoiar as campañas da CIF, e que os voluntarios que colaboran con esta poidan estar máis en contacto e apoiar as actividades dos emigrantes que usan internet para se achegaren a Galiza, á súa cultura e identidade como galegos.

A CiberIrmandade quere facer público o seu agradecemento.

A CiberIrmandade da Fala ven de por en marcha un novo foro sobre Coppermine, un sistema de xestión de galerías de imaxes e fotografías en internet. Dende ese foro pretendemos axudar nor problemas co Coppermine así como colaborar na súa tradución xa dispoñibel na nosa lingua. 

Podes ver o funcionamento do Coppermine na galería de imaxes e fotografías da CiberIrmandade da Fala. 

Dende aquí podes acceder directamente ao foro de Coppermine.

Unha vez que a TVG aceptou a cesión da versión galega da serie "A víbora negra", a distribuidora Cameo informou que era tarde de mais para incorporar a nosa lingua nos seus DVDs ao suporlle un sobre custe que non ían asumir. En todo momento tivemos claro que o único responsábel de que non se puidese disfrutar desas distribucións en galego era, en exclusiva, da TVG.

Inda así, a Ciberirmandade, apoiando as xestións feitas por A Mesa, puxemos en marcha unha campaña de resposta social tentando que Cameo reconsiderase a súa postura. A consecuencia foi que Cameo difundiu unha mensaxe na que se ve vontade a respeito da nosa lingua, comprometendose a que o idioma de Galiza estea dispoñibel nas vindeiras distribucións.

Xa que logo, entendemos que o obxectivo, inda que para o futuro, está acadado. Parabéns a todos e todas, e parabéns a Cameo.

Dende que transcendeu que a empresa Cameo tiña intención de distribuír en DVD a serie “víbora negra”, e que a TVG negaba a cesión da dobraxe en galego da mesma por mor de “incorreccións normativas”, o que motivaría que a distribución iría nas linguas inglesa, española, catalana e vasca, ficando fora a nosa lingua, houbo certa resposta social.

O día 3 de marzo, A Mesa pola Normalización Lingüística publicou no seu web que por fin a TVG aceptaba ceder gratuitamente a dobraxe, pero que a estas alturas a empresa Cameo vía que xa era tarde para incorporar a versión galega.

Independentemente dos criticábeis feitos pasados por parte da TVG, o certo é que temos que tentar influír a fin de que Cameo reconsidere a súa intención actual, e incorpore a nosa lingua na súa distribución.

Xa que logo, convidámosche a que participes no envío de correos á distribuidora Cameo no que, dun xeito amábel, agradezas o seu interese e solicites a reconsideración da súa postura.

Podes facelo dende aquí e agora con so cumprimentar o teu nome e correo. (Desactivamos este obxectivo por consideralo acadado).

A TVG accede a ceder as dobraxes ao galego da serie "A víbora negra". Desactivamos á TVG como obxectivo por estes feitos.

Mais información no web de A Mesa pola Normalización Lingüística.

Noraboa a todos e todas.

Agora que -por fin- hai unha distribuidora en Madrid chamada Cameo Media que tenta respectar todas as linguas co-oficiais sempre que sexa posíbel, e, comezando polo próximo lanzamento en DVD da serie "A víbora negra", varias veces amosada pola TVG ó longo dos anos, Cameo tentou que o lanzamento desta coñecida comedia inglesa incluise a lingua galega entre as suas opcións... pero, segundo informa na sua web oficial no referente á serie "Black Adder", a nova equipa directiva da Televisión Galega NON CEDE nin a dobraxe nin os subtítulos porque non están correxidos segundo a ultimísima normativa...

É necesario que se escoite a nosa voz; únete difundindo esta información e achegando un correo, tanto á TVG como á Secretaria Xeral de Política Lingüística, no que se amose o teu descontento. Podes facelo dende aquí e agora. Tan so son uns segundos.

(Desactivamos este obxectivo, pois segundo informa A Mesa, a TVG acepta ceder a dobraxe)

O web do Concello de Padrenda (http://www.padrenda.org), incumprindo coas suas obrigas, non ofrece a posibilidade de ler os seus contidos na lingua propia de Galiza, a língua que lle é propia. A maiores fan uso dalgún topónimo deturpado, como "La Cañiza" ou "San Juan".

Convidamosche a que coñezan o teu malestar, a que lles solicites a tradución, a que reivindiques os teus dereitos como galego ou galega. Podes facelo dende aquí e agora, nuns poucos segundos.

A Federación Galega de Surf incluiu opción en galego. Inda non está todo na nosa lingua, pero xa deron o primeiro paso.

Desactivamos o envio de correos a este obxectivo. Noraboa a todos e todas, e parabéns á Federación Galega de Surf.