Vén de ser liberada a nova versión do sistema operativo galego "Trisquel 1.5" , que seguindo a tradición desta distribución leva o nome de "Sirona", deusa celta, neste caso centroeuropea. As melloras son considerables con respecto á  última versión "Arianrhod", entre outras unha maior dotación de drivers(1700) e soporte para 1500  impresoras. 

Dende Ipanema gráfica informan: Nasce a Comic Arousa, inspirada na celebérrima tipografia criada por Vincent Connare em 1994, Comic Sans, que todos temos visto desde em letreiros de comércios até em documentos oficiais de hospitais.

A ideia foi criar umha tipografia semelhante a esta com traços da tipografia tradicional galega, e o resultado é umha fonte que a moitos lhe fará lembrar aqueles trabalhos de B.U.P. redigidos em Word. Quem nunca empregou Comic Sans?

O Songbird é un reprodutor multimedia multiplataforma (linux, windows, mac) gratuíto e libre, vinculado á Fundación Mozilla. O Songbird aproveita así moita da arquitectura que está facendo trunfar aos produtos da casa Mozilla, e conta entre as súa funcionalidades cun navegador web integrado, a posibilidade de incorporar extensións desenvolvidas polos usuarios, integración con dispositivos portátiles (iPods, USB e demais), unha boa política de control da privacidade sobre os teus ficheiros multimedia (audio e vídeo), pódese integrar co Audioscrobbler da last.fm… Fai todo o que fan outros reprodutores que non son de código aberto, e ademais faino ben, bonito, e barato.

Os rexistros de matrimonios e nacementos pódense realizar na lingua do país a partir deste luns, e antes de rematar o ano, tamén nas outras seis grandes cidades. O Rexistro Civil da Coruña pon en marcha este luns a aplicación informática Inforeg 4, que vai permitir que os cidadáns que así o soliciten poidan inscribir en galego a declaración de nacemento dun fillo, un matrimonio ou calquera outro trámite sobre o seu estado civil.

A Comisión pola Verdade do 36 organiza en Goián (Tomiño) as Xornadas “O Miño, unha corrente de memoria” que tratarán sobre as relacións entre as poboacións da raia no 36. Serán inauguradas hoxe 19 de outubro, pola Delegada da Consellaría de Cultura e a Alcaldesa de Tomiño. Haberá varias mesas redondas onde participarán algúns dos protagonistas da época, ademais da proxección de varios documentais, como  "O campo de concentración de Camposancos", de Xosé Ballesta, "A derradeira lección do mestre", dirixido por Xoán Carlos Garrido ou "Os traballadores do contrabando", de Victor Abundancia entre outros. Pódese ver todo o programa das Xornadas en InfoRosal.com

Logo das peticións dos seguidores da famosa serie "Heroes ", que ven de emitir a TVG este verán, Universal Pictures Iberia lanza o mércores 17 de Outubro a Primeira Tempada Completa da serie co son opcional en galego. Trátase da primeira vez que unha "major" americana fai expreso o seu respecto pola lingua Galega, e edita e distribúe una serie ou película con pistas de son na nosa língua. Logo do tempo que houbo que agardar para este fito, e das dificultades achadas polo camiño, desexamos que os seguidores da serie e o público galego en xeral fagan deste lanzamento pioneiro un éxito que lle dea pulo á empresa americana para voltar a inverter diñeiro na difusión da lingua galega, e o seu respecto; e así animar a outras empresas estatais ou estranxeiras a ir erguendo o tecido audiovisual de consumo en lingua galega, tan importante para nós.

A Mesa pola Normalización Lingüística analiza “con suma preocupación” as estatísticas publicadas recentemente sobre a lingua inicial en Galiza, que sinalan que o galego pasou de ser o primeiro idioma dun 60,3% dos galegos en 1992 a ocupar a posición minoritaria, do 20,6%, no ano 2004. A situación nas cidades é especialmente grave. Por exemplo, só ao 1,6% dos ferroláns e ao 4,3% dos vigueses lle falaron seus pais en galego.