Os xuíces e fiscais non aceptan a obrigatoriedade do coñecemento da lingua galega para exerceren o seu cargo na Galiza.

Os procesos de oposición con vistas a acceder aos postos de xuíz adoitan considerarse coma unha dura tarefa que precisa dunha grande adicación e dun elevado esforzo intelectual encamiñado á consecución de tan prezado cargo. Tan grande debe ser o esforzo para algúns que non lles queda espazo intelectual para poder aprender as linguas cooficiais teóricamente garantidas por Lei no País no que vaian exercer. Así, coa mesma, comunicáronlle este xoves á comisión para a reforma estatutaria as asociacións representativas destes colectivos, tanto de perfil conservador como as autocualificadas de progresistas, a súa negativa a unha posible obrigatoriedade do coñecemento do idioma galego para exercer a carreira xudicial na Galiza. Tanto xuíces coma fiscales rexeitaron rotundamente tal posibilidade dirixida a que os cidadáns poidan usar con liberdade nos xulgados esta lingua e argumentaron que na actualidade o emprego do galego neste ámbito é minoritario. Algún deles mesmo se opuxo a que se cualifique como mérito o coñecemento da lingua galega.

Semella procedente tratándose do tema do que estamos a falar lembrar que o artigo 14 da Constitución, que hoxendía ven sendo a normativa legal de máis rango e que todos os representantes da xudicatura deberían respetar, fala da igualdade diante da Lei sen que poida prevalecer discriminación ningunha por razón de nacemento, raza, sexo, relixión, opinión ou calquera outra condición ou circunstancia persoal ou social. Non costa moito discernir que coa súa actitude os xuices galegos están discriminando a todos e todas os/as galego-falantes ao impedirlles acceder en igualdade de condicións que os castelán-falantes á Xustiza.

Máis información en Vieiros, n'A Mesa e en Culturagalega.org. Podes amosar a túa opinión nos nosos Foros.