|
Está claro que hoxendía non semella doado conciliar o progreso económico-tecnolóxico (que ven sendo o mesmo na actualidade) coa conservación do Patrimonio tanto material como inmaterial de calquera lugar de mundo. Pero se nun lugar dese mundo é aínda máis compricado é na Galiza, e principalmente pola falla dunha conciencia propia de País que valore no seu xusto punto a realidade que supón ter unha Cultura e unha Tradición tan ricas e de raigame tan profunda.
Na Galiza non se conserva, senón que mal-mantéñense as cousas, tanto de corporeidade evidente coma aquelas que só se levan dentro do propio ser, daquelo que o galego e a galega teñen realmente de seu. O caso do Círculo Lítico da Mourela é un dos máis doentes, pero por desgraza non é o único. Cantas Mourelas hai na nosa Terra? Unha Terra na que semellamos empeñados en rematar coa existencia do que nos é propio e distintivo, ben sexa de ámbito arqueolóxico, urbanístico, ecolóxico, cultural ou lingüístico.
A investigación e desenvolvemento, existe? Pode que si, pero semella que só encamiñada á implantación de enerxías alternativas que rematan exportando o 90% da producción mentres nas nosas aldeas segue a haber restriccións en pleno século XXI.
E por se non chegase coa desfeita material que afecta ao legado histórico estamos en tempos de queimar e arrasar con todo por non sabemos ben que escuros intereses, pero que se deducimos van polo mesmo camiño do mal entendido "progreso material". A destrución do contorno, do medio ambiente vainos costar moi caro a todos.
Non se da conta a xente de que cando rematen co noso Patrimonio e coa nosa natureza rematarán coa Galiza? Seguramente é o que moitos queren, pero que lembren que sen Galiza non haberá diferencia e con iso non haberá nin turismo nin forza de reclamar os dereitos máis lexítimos, o que finalmente repercutirá onde lle doe á xente que está a desfacer a Terra: no peto.
Reflexionemos, e conservemos o noso. Sen Mourelas, sen fragas, sen carballeiras, sen soutos non hai Galiza, sen Galiza non hai futuro. E non esquezamos que Galiza é principalmente a súa lingua: o galego.
|
Inicio 
Novas CiberIrmandade 
Amnistía Internaciona
