O periódico galego de informaçom crítica procurou aproximar-se aos reptos actuais da nossa associaçom, decana na internet galega

No seu número 44 , o jornal «Novas da Galiza» publicou um artigo-entrevista na sua secçom 'Cultura' sobre a CiberIrmandade da Fala, umha das associaçons decanas na internet galega. A publicaçom salienta o compromisso da comunidade ciberirmandinha com a defesa da nossa língua desde "a pré-história da Rede", quando já detectávamos "umha grave insuficiência de conteúdos em galego".

O «Novas da Galiza» lembra alguns dos primeiros objectivos conseguidos pola CIF, como som a galeguizaçom dos sítios web de Estrella Galicia, de Castromil, ou a recente exigência da Direcçom Geral para o Desporto, que insta as Federaçons Desportivas para utilizarem o galego nas suas webs como requisito para receberem dinheiro público.

O periódico galego de informaçom crítica também recolheu em páginas interiores a anterior campanha da CIF, destinada a que o Parlamento Galego nom renove o seu compromisso com o Grupo Voz para a publicaçom do Boleto Oficial do Parlamento (BOPG) e o Diário de Sessons (DSPG).

Quatro anos de informaçom independente
O «Novas da Galiza» é uma publicaçom mensal nascida em 2002 como soma dos esforços de um conjunto de pessoas política e/ou linguisticamente militantes. O periódico definiu-se no primeiro ponto dos seus Princípios Fundacionais como um meio "ao serviço da liberdade de expressom" para "defender o direito da cidadania à informaçom plural e honesta".

A denúncia das lógicas esmagadoras do capitalismo e das suas contradiçons erigiu-se também como um dos sinais de identidade desta publicaçom. A sua renúncia de raiz à submissom a lógicas de mercado e capitalistas chega ao ponto de o periódico disponibilizar de graça todos os seus números em formato digital desde a hemeroteca da sua página web um mês depois da saída do número.

Profissionalizaçom em todos os âmbitos
Nos seus inícios, como dizíamos, o projecto foi impulsionado por um grupo militante linguística e/ou politicamente, mas na altura vive um processo de progressiva profissionalizaçom, até o ponto de mais da metade da equipa redactora serem licenciados em Ciências da Comunicaçom.

Essa profissionalizaçom também atinge o reparto das tarefas (redacçom e fotografia, maquetaçom, publicidade, contabilidade, logística, etc.), a coordenação da equipa através de reunions mensais do Conselho de Redacçom e a gestom de subscriçons e envio dos exemplares para os seus domicílios.

Mais informaçom
- Novas da Galiza
- Princípios Fundacionais do «Novas da Galiza»
- Hemeroteca do NGZ
- Subscrever-se ao NGZ via web