A Consellaría de Educación vai presentar no Parlamento unha proposta de decreto para regular o uso do galego no ensino non universitario. O borrador que se está a manexar aumenta o mínimo desde o 33% que figuraba no decreto 247/1995 (que nunca chegou a  cumprirse) ata un 56-68% nos distintos tramos educativos. E, o que é máis importante, contémplase que a aprendizaxe da lectoescrita sexa integramente no noso idioma.

A CiberIrmandade da Fala valora positivamente esta proposta de novo decreto, agardando que non fique en auga de castañas como o anterior, e que se forneza os centros dos medios necesarios para unha correcta aplicación, así como que se aseguren as inspeccións pertinentes.

Os nenos de entre 6 e os 8 anos recibirían un 68% de materias en galego; mentres que os de 8 a 12 anos terían entre o 60 e o 64%. Na ESO, no Bacharelato e nos ciclos formativos, o mínimo quedaría fixado nun 56%. Para Educación Infantil a proposta é dun 50%.

Esta normativa, aprobada tras a folta estudantil do pasado 8 de novembro, está na liña marcada tanto polo Plan de normalización da lingua galega aprobado por unanimidade no Parlamento, como coa Carta europea das linguas minorizadas, ambas as dúas lexislación de obrigado cumprimento.

Información máis polo miúdo en Vieiros e na web da Mesa pola Normalización Lingüística