Comunicamos aos integrantes da Asociación Cultural Galega Ciberirmandade da Fala, que xa está aberta a conta corrente para para ingresar a cota, establecida en 15 €/ano, que nos permita facer fronte aos gastos de funcionamento (nomeadamente, o pagamento da hospedaxe). Aproveitamos esta información para convidarvos a todos e a todas a participar na asociación e/ou facer doazóns económicas para o sostemento desta organización decana.

Como sabes a CiberIrmandade da Fala, tras varios meses de debate e traballo interno, presentou solicitude para constituirmonos legalmente en asociación cultural.

Este cambio forma parte dunha renovación global da CiberIrmandade, que puideches ver en primeiro lugar na nosa ferramenta principal, a páxina web, pero que abrangue tamén as dinámicas de traballo, a incorporación de proxectos asociados, de foros sectoriais, a galería de imaxes, as novas, a colaboración con outras entidades, a tradución de software...
Estes cambios fixeron que o número de ciberirmandiñ@s aumente cada día, o que levou consigo unha maior participación nas campañas e, en consecuencia, unha mellor resposta das empresas e institucións ás nosas suxestións ou demandas. É dicir, unha maior presenza do galego na rede.

Este incremento de actividade implica tamén un incremento dos custes de hospedaxe, polo que precisamos o diñeiro para sufragar, dun xeito mais estábel do que foi até agora (achegas voluntarias), as necesidades desta organización.

Polo momento o único xeito de facer o pagamento é a través dun ingreso na conta bancaria da CIF. Axiña ofrecerémosche outras posibilidades que polo momento non son viábies, como a domicialiación.