Vueling e Hotel Louxo: dúas webs que se galeguizan!
A semana pasada dúas páxinas web estrearon a súa versión en galego:  Vueling e Hotel Louxo. E todo grazas á presión social, ás campañas levadas a cabo por diversos colectivos, entre eles a Ciberirmandade. Por iso queremos agradecer a participación de todos os ciberirmandiños e ciberirmandiñas que colaboraron no envío de pregos. Mais aínda hai cousas por facer, informámoste en "Ler máis".

Vueling galeguizou a súa web despois de seis meses de campaña conxunta promovida pola Ciberirmandade da Fala e A Mesa pola Normalización Linguistica, dirixida non só a eles, senón ao conxunto das compañías aéreas. Lembrámoste que aínda hai moitas compañías que seguen sen ter a opción de galego na súa páxina web e que non respectan a toponimia oficial. Podes enviarlles un correo tipo desde a propia web da Ciberirmandade ou un diferenciado a cada unha delas desde a da Mesa.

No caso do Hotel Louxo - La Toja, o 18 de xaneiro colgouse na rede o contido das normas de cortesía do hotel, onde se prohibía "hablar en gallego". A reacción social foi inmediata, liderada principalmente por Celso Álvarez Cáccamo, que informou desde o PGL e por Carlos Callón da Mesa. Froito das protestas individuais, así como das conversas e reunións mantidas coa dirección do hotel, esta comprometeuse, alén de eliminar esa "norma" e de incluír unha nota pública de rectificación na súa páxina web, a comezar un proceso de galeguización das súas instalacións e servizos que incluiría:

- a elaboración dunha versión en galego da súa web,
- o cambio de denominación do hotel para respectar o topónimo oficial A Toxa,
- a inclusión do galego nas información que se ofrece á clientela,
- a redacción das normas internas en galego,
- contactar coa iniciativa Galempresa
- informar activamente nos medios da súa postura e dasa medidas que está a tomar