LongaLingua, publicación galega sobre lingua e sociedade, editada pola Mesa pola Normalización Lingüística, faise eco de dous exemplos do menosprezo que, dunha banda a xudicatura, e doutra a administración, teñen cara nosa lingua. Son o caso dunha oposición do Hospital do Salnés no que non se ofreceu o texto en galego e o caso da anulación dunha oposición do Concello de Carballo por ser o exáme de galego eliminatorio.

Sen exames en galego nunhas oposicións do Hospital do Salnés

Nuns exames das oposicións para as prazas de médicos celebrados recentemente na Fundación Pública Hospital do Salnés só se distribuíu o texto das probas en castelán. Cando algún dos opositores solicitou ter a versión na nosa lingua, encontrouse coa sorpresa de que non a había.

Para A Mesa pola Normalización Lingüística, "esta discriminación vulnera os mínimos máis elementais de cooficialidade do galego". Esta entidade cidadá considera que "esta exclusión pon en evidencia, máis unha vez, a lastimosa situación do noso idioma na sanidade, cuxa competencia detenta a Administración galega".

Por esa razón, o presidente desta organización, Carlos Callón, dirixiuse á conselleira de Sanidade, María José Rubio, para reclamarlle solucións. Callón recorda a "boa receptividade mostrada por esta conselleira na primeira entrevista que mantivo con dirixentes da Mesa", mais úrxea a "activar as medidas que o Plan Xeral de Normalización da Lingua Galega, aprobado unanimemente polo Parlamento galego, sinala para a área que vostede dirixe".

A Mesa considera que o Goberno galego debe pór os medios para "romper cos hábitos diglósicos que fan que moita xente galegofalante se sinta cohibida para usar a súa propia lingua cando vai ao médico". Insisten en que a gravidade desta situación é maior debido a que a maioría da poboación galega que precisa atención sanitaria é galegofalante. 

Anulan unha oposición en que o exame de galego era eliminatorio

O xulgado do Contencioso-administrativo número un da Coruña decretou a supresión dun concurso-oposición convocado polo Concello de Carballo para a selección dun asesor urbanístico. O Partido Popular presentara un recurso contra as bases das probas alegando que o feito de que o exercicio de lingua galega fose eliminatorio supuña discriminación.

Os populares baseáronse nun informe do secretario municipal que deixaba ver unha posíbel "desviación de poder", ao consideraren que o sistema escollido polo goberno local pretendía discriminar uns candidatos e premiar méritos doutros.

Segundo o PP de Carballo, o feito de que a proba de galego fose decisiva deixaba moitos aspirantes fóra.

O alcalde carballés, Evencio Ferrero, lembrou que as bases foran redactadas a proposta do Partido Popular e que o Concello xa suspendera as probas antes do auto do xulgado.

Fonte: A Mesa pola Normalización Lingüística . LongaLingua número 4-maio 2007