[MundoGaliza] O presidente do PP, Mariano Rajoy, comprometeuse a promover unha lei que garanta o dereito a usar o castelán no ámbito escolar en todas as administracións, iso se resulta elixido xefe do Executivo central nas vindeiras eleccións xerais.
Nunha conferencia sobre as prioridades de España pronunciada en Vigo, Rajoy sinalou que o seu proxecto de goberno non acepta as "manipulacións" con respecto á cuestión lingüística, porque segundo el "non se trata de non falar noutras linguas, senón de garantir que se poida usar o castelán en todo o territorio".

Este debe falar doutro país que eu non coñezo porque, até onde eu sei, o que non está garantido é o uso do galego. Cantos colexios haberá neste país que proscriban o uso do castelán?

Pódenme facer tranquilamente a manicura que acho que non vou precisar dedo ningún para contalos.

Quen fala de manipulación é, neste caso, quen manipula. Logo, como é que non acepta a súa propia obra?

Para o líder popular, o debate sobre o uso da lingua "é un problema de liberdade que esixe un posicionamento por parte do Goberno" e por iso insistiu en que non aceptará "manipulacións".

Rajoy realizou un balance da presente lexislatura, na que para o popular o Goberno que preside José Luis Rodríguez Zapatero non abordou as "verdadeiras prioridades" de España.

A saber cales pensa Marianico que son as verdadeiras prioridades da España. Xa pode durmir envolto nun pixama vermello e marelo e soñar coa letra que lle poría ao himno, logo podía facer balance de cantas estrofas, mellor liñas, ou case mellor aínda palabras é capaz de cantar dun himno que si ten letra e do que debería estar orgulloso.

Finalmente, criticou a inversión prevista para Galicia nos PGE e reiterou o seu compromiso de retomar o 'Plan Galicia' nos cen primeiros días de mandato se é elixido presidente.

Pois si, será que non lle parece ben a partida orzamentaria que recibirá a Galiza. Se o considera oportuno podíamos cambiar esta inversión exígua pola dos gobernos Fraga. As vacas fracas acho que prefiren ficar fóra da Galiza, ti que dis?... E o "Plan Galicia" que viña sendo?