|
Escrito por apana
|
|
Sábado, 22 de Marzo do 2008 |
|
 [galiciahoxe] Un estudo da Universidade do País Vasco sitúa o noso idioma con "eivas estruturais" e nun "posto intermedio" entre as linguas minorizadas da UE. No mapa europeo actual das linguas minorizadas -formado por 27 estados e 23 idiomas oficiais- o galego sitúase nun posto "intermedio" e precisa dun "pulo", segundo desvela un estudo da Universidade do País Vasco no que participa o investigador galego Nicolás Xamardo. O informe analiza algúns anos da presenza das linguas minorizadas nos medios de comunicación europeos, entre as que se atopa o éuscaro, catalán, galego, bretón, corso, frisón, gaélico, irlandés e o sami. Todas elas suman uns 11 millóns de falantes e máis de 30 millóns de habitantes.
Deste xeito, este estudo revela que o galego e o eúscaro se atopan nunha situación intermedia, o que supón que contan cuns "mínimos garantidos", pero "cunha serie de problemas estruturais". Fronte a iso, o catalán presenta un panorama "case normalizado, a pesar de que ten problemas nunha serie de puntos".
A situación nos medios é a de "non seguir cara a diante"
Nicolás Xarmardo apuntou que "aparentemente" o galego nos medios de comunicación "está ben" pero que "hai unha especie" de situación de "non empuxar, de non seguir cara a diante co que hai que continuar". Na súa opinión, existe un abandono dos movementos sociais neste aspecto, porque "se confía nas institucións, no público", pero advertiu de que esta situación "pode ser perigosa".
"Se non fas unha forza importante, o castelán vai gañando espazo", advirte o investigador. En canto á visión de futuro sobre o idioma galego, Xarmardo asegurou que "ninguén é realista" e postulou a "confianza no pobo" como ferramenta para seguir impulsando a lingua.
Recordou que "era impensable" hai poucos anos ter unha televisión toda en galego ou que algúns medios incluísen noticias no idioma propio pero que se conseguiu. |
Inicio 
