Segundo un estudo realizado pola Mesa, con información achegada polos propios centros de ensino, o 10,5% dos nenos e nenas de 3 anos das sete cidades non reciben nin tan sequera unha hora en galego ao día, mentres outro 16% só recibe xustamente unha hora en galego, moi por debaixo do estipulado polo decreto 124/07. No conxunto, o 69,8% dos rapaces e rapazas desta idade na Coruña, Lugo, Ourense, Pontevedra, Santiago, Vigo e Ferrol cursan os seus estudos en centros de ensino que non cumpren coa obriga legal de que cando menos a metade do seu horario sexa na lingua propia de Galiza.

Para corrixir esta situación, A Mesa pedirá entrevistarse co presidente da Xunta e coa conselleira de Educación, aos que cualifica como “responsábeis políticos desta nefasta xestión educativa”. Ademais, esta organización cidadá en defensa do galego tamén achegará os datos e pedirá que se adopten medidas tanto aos grupos parlamentares como ás executivas de BNG, PSdG-PSOE e PPdG.

“Xa que o PPdG repite continuamente que defende o que chama un bilingüismo equilibrado, agora ten unha extraordinaria oportunidade para demostralo e reclamar que se adopten medidas para que cando menos o 50% do horario dos nenos e nenas sexa en galego”, sinalan desde a organización cidadá. Ademais, ás direccións de BNG e PSdG-PSOE trasladaranlles “a necesidade de que se poña fin a este incumprimento vergoñento da lexislación, que supón un fracaso na formación lingüística dos nenos e nenas no idioma propio do país e pon en perigo o futuro da cultura galega”.

Así mesmo, ás formacións que sustentan o Goberno galego lembraranlles que a Consellaría de Educación non está a aplicar o acordo asinado por ambas as forzas tras as eleccións, descrito como “un contrato coa cidadanía” e no cal se indicaba literalmente que desde a Xunta se comprometerían “activamente coa efectiva e inmediata aplicación das medidas de galeguización do ensino recollidas no Plan de Normalización Lingüística aprobado unanimemente polo Parlamento galego en setembro de 2004”. Desde A Mesa lamentan que “até hoxe non houbo aplicación nin efectiva nin inmediata ou tan sequera parcial e progresiva” por parte da Consellaría de Educación, senón “un simple lavado de cara a través da aprobación do decreto 124/07, sen tomar nin unha soa medida para garantir a súa aplicación, como podería ser un plan de formación para o profesorado, campañas de sensibilización, promover unha guía de recursos en galego para as diferentes materias e tramos educativos, garantir a existencia de material pedagóxico nesta lingua para as diferentes disciplinas etc”.

A Mesa tamén ten previsto manter reunións con sindicatos de profesorado, movementos de renovación pedagóxica e asociacións de nais e pais, para impulsar “un debate nacional crucial se queremos conseguir que exista unha formación de calidade para os nenos e as nenas”

 

http://www.amesanl.org/noticias/noticia_tipo.asp?IDNOTICIA=1187