|
 [xornal.com] A solidariedade do Estado con Galiza non está tan clara como pretenden algúns, xa que a carga tributaria soportada polos galegos foi de 11.625 millóns de euros, moi enriba dos 7.592 millóns para facer fronte aos gastos por competencias transferidas, segundo explica Francisco Rodríguez, membro da Executiva Nacional do BNG, nun artigo que publica en Xornal.com, baixo o título "A contracorrente". Para o ex congresista do BNG, resulta "abafante e sintomático" o empeño informativo e dos economistas académicos oficiais en manter a sociedade galega "na ignorancia e/ou manipulación a respecto dun tema tan crucial como o financiamento da comunidade autónoma".
Nin Pedro Solbes se atreve a tanto, di Paco Rodríguez
Nin o Ministerio de Economía e Facenda nin o seu tiular, Pedro Solbes, se atreven a tanto, segundo este ex diputado do BNG no Congreso. Paco Rodríguez conta nese senso algo máis que unha anécdota ó fío dos propios dados da liquidación do sistema de financiamento que se fai cada dous anos, en concreto o último en maio de 2008 sobre o 2006: "Tiven a ocasión de comprobar -escribe en Xornal.com- como a resposta do Sr. Solbes a un meu posicionamento claro a este respecto foi: 'No por Dios, no se puede decir que Galicia viva gracias a España'. Nin siquer nas publicacións oficiais últimas do Ministerio de Economía e Facenda se afirma que a aplicación do sistema de financiamento actual provoque solidariedade e nivelación".
Rodríguez constata que foi o nacionalismo en solitario, "especialmente grazas aos traballos do economista Xosé Díaz Díaz", quen se atreveu a replicar demostrando "a ignorancia, a ocultación e a manipulación que subxacen nos discursos do academicismo sustentador as proclamas axitativas das dereita e esquerda española na Galiza". Sobre uns e outros di que "son uns auténticos vendedores de propaganda".
Para Francisco Rodríguez, o debate na Galiza adiantou "en clareza" grazas a que tiveron que confrontarse con informacións que nunca ofreceron os que tiñan capacidade e medios para facelo. "Felizmente -observa- agora sabemos que a carga tributaria soportada polos galegos, como consecuencia do sistema fiscal español, chegou en 2006 á cantidade de 9.041 millóns de euros polos impostos integrados no sistema de financiamento, máis outros 2.584 millóns de euros por impostos non integrados no sistema de financiamento. En total, a cantidade de 11.625 millóns de euros. Unha cantidade que está moi enriba dos 7.592 millóns de euros que lle foron entregados por Galiza na liquidación de 2006 para facer fronte aos gastos por competencias transferidas (Ensino, Sanidade, Benestar Social, fundamentalmente)".
“Miseria da Solidariedade” e terrorismo científico
O ex xefe de filas do BNG no Congreso adianta en Xornal.com "un clarificador" traballo de Xosé Díaz Díaz, denominado “Miseria da Solidariedade”, de próxima aparición en Terra e Tempo, que demostra como unha cousa son os gastos que se nos imputan e outra moi diferente os realmente realizados.
"O método utilizado para elaborar as Balanzas Fiscais pola Fundación do BBVA para o período 1991-2005, publicadas no ano 2007 -explica tamén Paco Rodríguez-, representan o exemplo prototípico dunha tese predeterminada. Tan predeterminada que deben saber que, por de pronto, para acadar o resultado oportuno, se nos imputan, en nome dun denominado principio de beneficio, gastos localizados en Madrid como os gastos xerais das administracións públicas, defensa, orde e seguranza pública, ou de organismos como Holding Olímpico, Centro de Arte Reina Sofía, Museo Nacional del Prado, Fundación Thynssen Bornemisza, Fundación Museo Sorolla, Fundación Teatro Lírico... O que se fai para reivindicar a españolidade e anular a capacidade real de Galiza!". O remate é rotundo: "Auténtico terrorismo científico, como di Xosé Díaz Díaz". |
Inicio 
