Protagonizou o cambio de rumbo das nosas letras nas décadas dos sesenta e os setenta, con obras como o poemario Con pólvora e magnolias e o libro de relatos O crepúsculo e as formigas. Foi quen de construír unha voz propia e inconfundible, na que conviven realismo, fantasía e simbolismo. O seu forte compromiso político e coa lingua plásmanse nas súas creacións, tanto narrativas como poéticas.

Na categoría de Pensamento e Cultura Científica, os membros do xurado escolleron ao edafólogo Franciso Díaz-Fierros, do que destacaron a súa capacidade para colocar na axenda da cultura galega a cultura científica e saber unir a investigación con problemáticas actuais da sociedade galega, como o medio ambiente. Díaz-Fierros ten unha longa traxectoria como académico e investigador nos campos da Edafoloxía, a Farmacia e a Química Agrícola. Conferenciante e membro de numerosas Sociedades Científicas estatais e internacionais, ten participado en máis de trinta proxectos científicos ou técnicos. Preside a xunta rectora do Seminario de Estudos Galegos e é vicepresidente primeiro do Consello da Cultura Galega. É académico numerario da Real Academia de Farmacia e desde 1999 ocupa o cargo de director da Colección Historia Natural do Proxecto Galicia, de Edicións Hércules.

E no eido do Patrimonio Cultural, a remodelación urbana de Pontevedra foi o feito máis destacado para o xurado, polo alcance da rehabilitación e revitalización do casco histórico, feita con visión de cidade, rúa a rúa e coa intervención de varios arquitectos. A traxectoria seguida pola cidade destaca polo enfoque global co que se abordou a posta en valor do patrimonio e pola intensidade das actuacións realizadas, que lograron mudar a situación do casco histórico e colocalo no centro da vida social e económica.