Seica non o colleron nun hotel por falar galego.

Certo. Entregara un curriculum vitae e acudín a unha entrevista. A condición sine qua non era que falase co director e os compañeiros da recepción en español e nunca en galego. Considereino unha humillación e non aceptei o posto.

Entón non é que non o collesen.

Prohibíronme falar galego e na entrevista o primeiro que me dixo o director, Miguel Tejada, foi iso.

Claro, se falase idiomas...

Falo moitos. Teño experiencia con alemáns, ingleses, franceses...

Cantos fala?

Alemán, francés, italiano, inglés, portugués e español.

Só?

Xa me chega!

Non pensou extirpar iso do galego?

Non teño remedio. Isto do galego non ten cura.

Tampouco lles gustou que o seu nome de pía estivese en galego.

Foi unha brincadeira. En recepción, cando cheguei, dixeron: mira, vén un galeguista. Polo menos foi iso o que me comentou o director. El quería entrar en conflito comigo, mais eu non o desexaba. Non quería falar de sociolingüística, nin convencelo de ningunha idea política, foi o que lle dixen. Eu ía polo traballo.

E seguro que o sitio ese era un hotel?

Aparentemente, pero ten a política de empresa que me impedía falar galego cos compañeiros da recepción. Os camareiros e o persoal de limpeza si poden falar galego entre eles. O hotel chámase Ciudad de Vigo.

A entrevista quen lla fixo, alguén da competencia?

Dame que si. Nese hotel o BNG ten organizado asembleas e actos internos. Despois disto non me estrañaría que os do Bloque deixasen de ir. É como non contratar persoas homosexuais ou negros, van perder esa clientela. Non teñen nin idea de relacións públicas.

Van ter razón os de Galicia Bilingüe, o galego non é un idioma útil. Mesmo parece perigoso sabelo.

Ás veces si.

Non será que saber galego resta no curriculum vitae?

Depende onde. Eu fágoo en galego para que teñan clariño que é o idioma que falo.

Vostede ten experiencia no sector?

De tres anos, en Fuerteventura e Santiago.

E valeulle falar varios idiomas?

Claro.

E galego?

En Santiago coa clientela, en Fuerteventura cos compañeiros e con algúns clientes.

Se cadra falar galego só é útil para emigrar.

O mellor é inimigo do bo. O máis útil é inimigo do útil. Todos os idiomas son útiles.