PRAZA DAS LETRAS - O cómic de Art Spiegelman estará nas librarías o 13 de xuño. Ademais, Faktoría K publica “Os cinco narradores de Bagdad”, dos franceses Frantz Duchateau e Fabien Vehlmann. A editorial mallorquina Inrevés saca ao mercado o próximo 13 de xuño o cómic Maus traducido ao galego por Diego García. Esta novela gráfica está considerada unha obra imprescindíbel polos adeptos do cómic. A mesma editora foi a encargada da versión catalá de Maus.

Maus é unha autobiografía na que Art Spiegelman relata a historia do seu pai Vladek, un sobrevivente de Auschwitz. Realiza tamén un retrato do seu pai na actualidade, no momento en que o entrevista para que lle transmita as súas lembranzas da guerra, e da súa tensa relación con el.

Vai máis alá do Holocausto, internándose na psicoloxía do pai, na sombra dunha nai suicida e na pantasma dun irmán ao que nunca coñeceu. Como característica formal cómpre salientar que as personaxes amosan trazos faciais de animais, recurso que Spiegelman emprega con fins narrativos. Deste xeito representa aos xudeus como ratos e aos nazis como gatos.

Maus está considerado unanimemente pola crítica como un dos mellores cómics da historia, que non só transcendeu ao gran público, senón que acadou un recoñecemento notable. En 1992 gañou o Premio Pulitzer e mesmo o Museo de Arte Moderna (MoMA) de Nova York lle dedicou unha exposición.

As editoriais especializadas na banda deseñada en Galicia tamén se decatan de que existe unha demanda en galego e un público disposto a mercar as obras de referencia mundiais do cómic no seu propio idioma. É o caso de Faktoría K, que vén de traducir Os cinco narradores de Bagdad, banda deseñada dos franceses Frantz Duchateau e Fabien Vehlmann, que levou recentemente o premio Canal BD das librarías especializadas europeas.

O álbum relata as peripecias de cinco contadores de historias afanados na procura do mellor conto do mundo para gañar o reto proposto polo califa de Bagdad. O rosmón, o filósofo, o perspicaz, o rebelde e o xentil, así están caracterizados os protagonistas do cómic, pensados como arquetipos humanos cos que cadaquén atopará a súa identificación. O exotismo de Oriente Medio e o ambiente envolvente de cada historia, emulando o estilo de As mil e unha noites, transportan ao lector a outra esfera da realidade, dominada pola fantasía e a arte dos contos.

http://www.prazadasletras.org/actualidade/novas/nova/429/maus-considerado-unha-obra-mestra-do-comic-en-galego