[O Correo Galego] "¿Que é normalizar? Coidamos que vén a ser ir facendo cotián aquilo que non o é ou que perdeu o seu carácter habitual, e con el a ética, a estética e mesmo a dignidade. E perdouno porque algo ocupou o seu sitio como subtituto", di o arqueólogo e escritor Felipe Senen, nun documentado artigo publicado no último número de O Ollo Público, revista das artes.

A publicación, única revista cultural escrita en galego, chega ao seu número 23 da segunda etapa renovando permanentemente o seu deseño e mantendo a excelente calidade do seu contido, apoiado en artículos de cualificados profesionais.

Na portada, unha seductora pintura de Pájaro -artista ao que se pode achegar visitando a páxina web: www.pajaro-art.com-, é a única ilustración e deixa as gañas de ver máis traballos do pintor, que finalmente poden ollarse a partir da páxina 17, nun artigo asinado por Perán Eminy, crítico de arte internacional e director de relacións nacionais e internacionais da Asociación Venezolana de Artistas Plásticos.

"Procuramos mostrar a obra de artistas internacionais para que aquí se saiba o que se fai fora", di o director de O Ollo Público, Fernando Vilaboa Martínez, que engade: "Esto vale para a pintura e para a fotografía pero, nesta nova etapa tamén destacan os artigos de cine, ou de literatura, onde seguimos a nosa liña de facer a tradución de poetas europeos á língua galega". Sen dúbida, todo o respecto e todo o amor pola fala.

Na plantilla de colaboradores deste número, figuran ademáis os nomes de J.A. Cidre Bardelás, arquitecto; José Ángel Vilas, profesor de Historia da Música do Conservatorio de Vigo; Óscar Suárez (activista do cine), catedrático de Ética na Universidade Autónoma de Madrid; Marta Méndez Rebolo, licenciada en Historia da Arte pola USC e La Sapienza, de Roma; Xavier Moreda, perruqueiro e políglota; Gustavo Luca de Tena, xornalista; a viñeta de Pepe Carreiro, e o propio director, Fernando Vilaboa, que entrevista a Achernar.