CULTURAEDEPORTE Mámoas, dolmens, cistas, menhires... O megalitismo foi un fenómeno que deixou en Galiza mostras espectaculares da construción prehistórica con grandes laxes, espalladas por toda a xeografía do país. Monumentos funerarios que ás veces non son coñecidos nin apreciados. A Consellaría de Cultura vai declarar Ben de Interese Cultural, o máximo grao de protección, 48 cámaras megalíticas, que se unirán ás 4 que xa teñen esa cualificación. Trátase dun ambicioso plan para poñer en valor e protexer os principais xacementos megalíticos de Galiza, algúns tan emblemáticos como a Pedra da Arca de Malpica, Chan de Arquiña en Moaña, a Casola do Foxo en Muíños e a Roza das Modias en Vilalba; outros case descoñecidos e que agora serán protexidos e divulgados como merece.