XORNAL.COM   O vicepresidente da Xunta, Anxo Quintana, aproveitou a súa presenza hoxe na XXIX Festa do Gaiteiro de Soutelo para reivindicar o papel da lingua como espazo de reafirmación da nosa identidade como pobo, logo de anos de represión e silenciamento. O vicepresidente afirmou a este respecto que “algúns, dende fóra de Galiza, tentan falar dunha persecución do castelán no noso país e iso é faltar á verdade”. Engadiu que, tratar de buscar problemas onde non os hai, constitúe unha sorte de “racismo lingüístico que non estamos dispostos a tolerar”.

Quintana considera que, nun mundo globalizado, a identidade propia nunca é un problema, senón unha riqueza e un valor engadido que “temos que aproveitar”. O vicepresidente explica que, dende fóra, intentan trasladarnos unha guerra lingüística e de identidade que nada ten que ver coa nosa realidade. “Non hai causa xusta no mundo que se poida sustentar nunha mentira”, insistiu, ao tempo que reivindicou a actitude e o traballo dos galegos e galegas por manter a nosa identidade como a mellor resposta a estes ataques. Engadiu que “os galegos e galegas somos un pobo con identidade propia que pode vivir con tódalas culturas”, ademais de reclamar “para a nosa lingua, a nosa identidade e a nosa cultura o mesmo estatus que para o resto das culturas”.